ليا دقت هواجيسي وسال الحبر في الدفتر
تولّع صفحته والنار في سطره وفي قافه
حروف هاجرت دار الشعور لساحة المحشر
حروف ذنبها الأوحد لورد الشعر قطافه
صنعت من القوافي كوب قهوه زايد السكر
وشبـيت المعاني وابلغ الكلمات نسكافه !
أبي لي ليل يسهرني قهر ذا الليل ما يسهر
تعبت أسترحم الليل المزيف وأطلب إنصافه
أبي نجمه صفاها أكبر , عطاها أكثر ,وابي تجبر ....
كسر قلبي من الأيام , لماعه وشفافه
أنا الليله سهرت أميز الأحوال وأفكر
وعيني حاربت نوم الكرى ودموع ذرافه
ماغير ادوج في دروب الهوى ومن الغرام أسكر
وتَعَـبّـت الطريق بموتري وأنوار كشافه
ملل , ضيقه , كآبه , غدر , هذا الحال أو أكثر ...
غوايه , تيه , رهبة نفس من هالحال خوافه
ليا شاهدت لي دره أغوص البحر واتبختر !!
وانا ذاك الفقير اللي تكسر راس مجدافه !!
وانا الحر السجين اللي سرى للخوف والمهجر
على اكتافه نقل حمل السهر ما طاحت اكتافه
ولا ارضى نظرة الرأفه وأشجبها وأستنكر
وانا العاجز وانا اللي حلت الرحمه على أطرافه
وانا حرً عزيز وللأسف بالعز يتستر
يكسر وقتي العزه بلا رحمه ولا رافه
ابي تغيير ياخذني من امواج الردى للبر
كفايه ما شكى قلبي من الدنيا وما شافه
يطول العمر والا يا عسى يا هل العقل يقصر
مدام ان الرخيصه رغبة المعتوه والتافه